|
||||
| Michael Jordan sést á tveimur stöðum í einu |
 SÁ UNDRAVERÐI atburður átti sér stað í gær að körfuboltagoðsögnin Michael Jordan sást á tveimur stöðum í einu vestanhafs. Ljósmyndir náðust af Jordan að taka við heiðursverðlaunum fyrir úrslitaleik í körfubolta milli menntaskóla í Norður Karólínu-ríki á sama tíma og hann var ljósmyndaður brosandi á golfvelli í fylgd með Tiger Woods í Flórída-ríki. Jordan hefur ekki viljað tjá sig um málið en fjölmiðlafulltrúi hans sagði að körfuboltahetjan hefði ekki verið á tveimur stöðum í einu enda „væri slíkt ekki mögulegt vegna þess að líkami Jordans væri bundinn lögmálum tíma og rúms líkt og annarra“.Margir hafa lýst yfir efasemdum um þessa fullyrðingu enda hefur Jordan áður storkað náttúrulögmálum jarðar; til er ljósmynd af honum í leik gegn Charlotte Hornets frá árinu 1991 þar sem hann sést gefa á sjálfan sig á öðrum stað á vellinum. Charles Barkley sagði jafnframt í ævisögu sinni frá árinu 1997 að þegar Bandaríkjamenn sigruðu á Ólympíuleikunum í Barcelona árið 1992 hefði hann eitt sinn séð Jordan baða sjálfan sig í sturtuklefa liðsins og rétta sér svo handklæði þegar enginn var á ferli. Velta spekingar vestanhafs því nú fyrir sér hvort Jordan hafi beitt þessu bragði sínu, að sigrast á tíma og rúmi, í leikjum í NBA-deildinni og með því stuðlað að því að Chicaco Bulls-liðið vann sex NBA-titla meðan hann spilaði með liðinu.  Einnig hefur nú rifjast upp frásögn blaðamanns frá dagblaðinu New York Times frá árinu 1999. Hann reyndi að ná sambandi við Jordan og hringdi á heimili hans. Eiginkona hans Juanita svaraði í símann og þegar blaðamaðurinn spurði eftir Jordan svaraði eiginkonan: „Ja, hann er reyndar úti að slá garðinn og að púsla með syni okkar uppi á þriðju hæð.“ Löngum hefur verið talið ómögulegt að staðsetja sig á tveimur stöðum í einu enda flokkast slíkt undir tímaflakk. Vitað er hins vegar að færustu búddar hafa getað staðsett sig á sex stöðum í einu og til eru óyggjandi sannanir fyrir því að söngvari kalifornísku hljómsveitarinnar The Offspring, Dexter Holland, hafi sést á þremur stöðum í einu í júní árið 1995, þar á meðal inni í trommusetti. |
