|
||||
| Ný rannsókn leiðir ekkert í ljós |
 NIÐURSTÖÐUR hafa nú fengist úr viðamikilli rannsókn á mannlegu atferli vegum tíu stærstu háskóla heims. Rannsóknin stóð yfir í þrjú ár og alls tóku 4.000 manns þátt í henni. Niðurstöður rannsóknarinnar voru engar.Joshua Weidermann, prófessor í sálfræði við Stanford-háskóla í Bandaríkjunum, segir að rannsóknin hafi gengið vel á öllum sviðum og niðurstaðan sé þvert á ætlanir og spádóma fremstu fræðimanna heims. „Við athuguðum viðbrögð manna við mismunandi áreiti og könnuðum hvernig fólk tókst á við aðstæður sem það hafði aldrei upplifað áður. Úrtakið var stórt og mælingar ákaflega nákvæmar. Sameiginleg niðurstaða okkar var að rannsóknin hefði ekki leitt neitt sérstakt í ljós.“ Miklar væntingar voru bundnar við einn þátt rannsóknarinnar sem fólst í því að athuga hvernig grænmetisætur brugðust við þeim aðstæðum að vera komið fyrir inni í þyngdarafls-klefa þar sem aðstæður eru eins og á tunglinu. Einungis var í boði að neyta kjöts inni í klefanum. Francis Hong-Wi, prófessor í eðlisfræði við Harvard-háskóla segir niðurstöðuna hafa verið sláandi. „Að vera skyndilega settur í sama umhverfi og ríkir á tunglinu getur haft gríðarleg áhrif á taugakerfi fólks - þetta þekkjum við frá geimförunum okkar hjá NASA. Við bundum því miklar vonir við að sjá hvernig grænmetisæturnar myndu bregðast við í þyngdarafls-klefanum ... en svo borðuðu þær bara kjötið og sögðu hvorki né gerðu neitt sérstakt. Flestir lögðu sig bara. Niðurstaðan í þessum þætti rannsóknarinnar sem öðrum var engin.“ Einnig var rannsakað hvernig fólk hagaði sér í umferðinni daginn eftir að því var sagt upp af maka þeirra og brotist var inn á heimili þeirra og þau beitt ofbeldi af ræningjunum. „Það gerðist bara ekki neitt. Sumir grétu reyndar en flestir keyrðu bara alveg eins og venjulega. Brutu ekki fleiri reglur en venjulega. Keyrðu ekki hraðar. Keyrðu ekki hægar. Rannsóknin leiddi ekkert í ljós og það þótti okkur stórmerkilegt,“ segir prófessor Weidermann. Þá var rannsakað hvort kaffidrykkja í óhófi hefði mismunandi áhrif á kynþætti. „Þar var sama uppi á teningnum. Allir hresstust mikið og urðu orkumiklir stundarkorn. Það var enginn munur á Asíubúum, hvítum mönnum, blökkumönnum eða indíánum - allt var eins. Niðurstaðan var engin.“ Háskólarnir hafa nú hafið aðra rannsókn sem mun mæla áhrif þess á sjón fólks að fylgjast með tveimur hlutum samtímis í þrjár klukkustundir sem ekki eru í sömu fjarlægð frá tilraunardýrinu. |
