BARACK Obama, forseti Bandaríkjanna, sættist á dögunum við vélmenni sem hann hefur átt í deilum við frá barnæsku. Sáttafundurinn fór fram í almenningsgarði í Washington og stóð yfir í rúma klukkustund.

Talsmaður Hvíta hússins, Robert Gibbs, sagði forsetann vera afar ánægðan með að honum og vélmenninu hafi loks tekist að grafa stríðsöxina.

„Eftir áralangar deilur hafa forsetinn og vélmennið nú loks náð sáttum. Forsetinn hefur ávallt borið mikla virðingu fyrir vélmenninu þrátt fyrir hinn málefnalega ágreining sem verið hefur þeirra á milli í bráðum 40 ár.“

Vélmennið ávarpaði blaðamenn stuttu eftir sáttafundinn með forsetanum. Það sagði skrýtið að áralangar deilur þess og forsetans séu nú að baki en það sé engu að síður ánægt með niðurstöðuna. „Ég og Obama forseti höfum nú lagt áratugalangar og grimmúðlegar deilur okkar og ágreining til hliðar. Ég verð aldrei sammála herra forseta en ég styð hann heilshugar í öllu sem hann gerir enda elska ég land mitt og þjóð.“

Sjónarvottar segja að Obama og vélmennið hafi heilsast alvarleg í bragði í upphafi fundarins og þau sest garðbekk. Fljótlega hafi tekið að hitna í kolunum og eftir fáeinar mínútur mun vélmennið hafa strunsað burt í fússi. Obama mun þá hafa hlaupið vélmennið uppi og þau rifist undir stóru eikartré um skamma hríð. Obama hafi þá stuttu síðar klætt sig hörkulega aftur í frakkann sinn og hreytt einhverju í vélmennið. Vélmennið mun þá hafa gengið á eftir Obama og stuttu síðar féllust þau, að sögn sjónarvotta, í faðma á göngustíg í garðinum.

Deilur Obama forseta og vélmennisins hófust í strax í barnaskóla. Vélmennið var þá í öðrum vinahóp en Obama og ágreiningur þeirra teygði sig inn á síður blaðanna þegar vélmennið og forsetinn stunduðu háskólanám við Harvard. Vélmennið var harður andstæðingur Obama þegar sá síðarnefndi sóttist eftir sæti Illinois-ríkis í öldungadeild Bandaríkjaþings. Þá aðstoðaði vélmennið John McCain í baráttunni um forsetastólinn og talið er að vélmennið hafi lekið ýmsum upplýsingum í fjölmiðla um háskólaár Obama, þar á meðal upplýsingum um meintar krakkreykingar hans.

„Mér þótti tímabært, nú þegar ég er orðinn forseti, að ég og vélmennið myndum grafa stríðsöxina. Svo ég hringdi bara í vélmennið fyrir stuttu og við vorum sammála um að halda sáttafund,“ sagði Obama i viðtali við CNN í gær.