|
||||
| Alþingi samþykkir 15% álagningu á Ilmi Kristjánsdóttur |
 Á TÓLFTA tímanum í nótt samþykkti Alþingi nýtt frumvarp sem gerir ráð fyrir því að álagning á Ilmi Kristjánsdóttur, leikkonu, aukist um rúm 15%. Hart var deilt um frumvarpið og hvatti stjórnarandstaðan eindregið til þess að það yrði dregið til baka. Samkvæmt höfundi frumvarpsins, Steingrími J. Sigfússyni fjármálaráðherra, á álagningin að auka tekjur ríkissjóðs og um leið sé hún til þess fallin að gera sjónvarpsefni fjölbreyttara.„Álagningin á Ilmi er augljóslega nauðsynlegur þáttur í aðhaldsaðgerðum okkar og fyrsta skrefið af mörgum í tekjuöflun ríkissjóðs,“ sagði Steingrímur á Alþingi í gær. „Ilmur Kristjánsdóttir er vissulega hæfileikarík leikkona, en velgengni hennar hefur vaxið of ört á síðustu mánuðum og okkur fannst rétt að ríkið gripi til aðgerða til að jafna aðgengi annarra leikara að ljósvakamiðlunum. Hún er einfaldlega of sýnileg og það að skattleggja verk hennar og hana sjálfa er tilvalin leið til að stýra íslenskri menningu.“ Þingmenn stjórnarandstöðunnar gagnrýndu frumvarpið harðlega og voru þeir sammála um að álagningin væri í senn „ótímabær og vitlaus.“ „Vissulega verða aðrir leikarar að koma til móts við aukna velgengni Ilmar, en ég tel hinsvegar að ríkið eigi ekki að stýra því hvaða leikarar séu mest áberandi í sjónvarpinu,“ sagði Tryggvi Þór Herbertsson, þingmaður Sjálfstæðisflokksins. „Álagningin mun vissulega færa þónokkrar tekjur til ríkissjóðs en um leið mun hún auka skuldir heimilana um hærri upphæð í formi vísitöluhækkunar.“ Ilmur Kristjánsdóttir hefur um nokkurt skeið verið ein ástsælasta leikkona þjóðarinnar og allt frá útskrift hennar úr Leiklistarskóla Íslands árið 2003 hefur hún verið áberandi í fjölmörgum leikritum, sjónvarpsþáttum og kvikmyndum. Bráðlega mun Stöð 2 sýna rómantískan gamanþátt eftir Ilmi þar sem hún leikur jafnframt aðalhlutverkið, en hann ber nafnið „Ástríður.“ Mun hann hafa gert útslagið í ákvörðun ríkisstjórnarinnar. Heimildir Dindils herma að næsta skref ríkisstjórnarinnar verði að skattleggja hljómsveitina Retro Stefson. „Það gerir ekki svona ungu fólki gott að fá of mikla athygli, þótt þau séu rosalega hress á sviði,“ sagði heimildarmaður. |
