|
||||
| Steingrímur Njálsson hlýtur fálkaorðuna fyrir misskilning |
 „Ég var að stíga út úr SAAB-inum mínum á Bessastöðum, þegar hringt var í mig, og mér tilkynnt um að þetta hefði verið mistök. Ég átti aldrei að fá fálkaorðuna. Þetta var sem sagt bara dregið til baka á allrasíðustu stundu, sem mér fannst náttúrlega bara mjög óheppilegt og dónalegt,“ segir Steingrímur Njálsson, en fyrir vangá forsetaritara var Steingrími tilkynnt um að hann ætti að hljóta hina íslensku fálkaorðu síðasta mánudag. Í raun átti tilkynningin að fara til annars manns, sem neitað hefur að gefa upp nafn sitt.Örnólfur Thorsson forsetaritari hefur lýst því yfir að mistökin sem gerð voru í þessu máli skrifist alfarið á hans reikning. Það stóð aldrei til að veita Steingrími Njálssyni fálkaorðuna og nafn hans var aldrei nefnt við Ólaf G. Einarsson, formann orðunefndar og fyrrverandi ráðherra. Orðunefndin frétti fyrst af málinu á fundi á þriðjudag og fékk á fundinum skýringar á mistökunum hjá Örnólfi forsetaritara. Atvikið er að sönnu afskaplega óheppilegt, svo ekki sé meira sagt, og gera má ráð fyrir að samskipti forsetans og Steingríms á Bessastöðum á mánudag hafi verið stirð þegar forsetinn útskýrði fyrir Steingrími ástæður þess að ekki yrði af orðuveitingunni.  Eivör Guðnadóttir, fyrrverandi forstjóri, fyrrverandi ráðherra, fyrrverandi konsúll og fyrrverandi sendiherra, sagði að um væri að ræða ótrúlegan dónaskap af hálfu forsetaembættisins við þegn sinn. Málið allt væri ótrúlegt. Úr því að búið var að tilkynna Steingrími að hann ætti að hljóta orðuna hefði einfaldlega átt að sæma hann orðunni. „Forsetaembættið dregur ekkert svona til baka, það er bara út úr kú,“ sagði Eivör. Innt eftir því hvort þetta kæmi til með að hafa áhrif á samskipti Íslands við önnur ríki í heiminum sagði Eivör: „Nei, ég held til dæmis að í Bandaríkjunum hlæi menn bara að þessu.“ Það er mál manna að forsetaembættið hefði átt að kyngja mistökunum og veita orðuna. Að sögn vitna og sjónarvotta bar Steingrímur sig af stakri prýði og jafnaðargeði, og skálaði við þernur Bessastaða inni í eldhúsi áður en hann ók af vettvangi. Ólafur Ragnar Grímsson, forseti Íslands, sendi frá sér opinbera afsökunarbeiðni fyrir hönd embættisins, þegar Logi Bergmann Eiðsson hljóp ásamt myndatökumanni forsetann uppi í Elliðaárdalnum, en þar var Ólafur staddur í hjólreiðatúr í gærdag. Steingríms-óhappið kemur eins og köld vatnsgusa í andlit forsetaembættisins, því að fyrir helgi voru gerð önnur sambærileg mistök, þegar tilkynning var send til bandaríska sendiherrans Carol van Voorst um að hún ætti að hljóta fálkaorðuna. Hún átti ekki heldur að fá hana. |
